يا قلبي اللي توهج واحرق الصدري
من بعد فرقا فريخن لازم العشّي
فرخن صغيّر و كنه حبة التمري
عشّه صغيرن ولاهو عش من قشّي
دمعي علي الخد من فرقاه منتثري
لانه مريضن و جسمه صار متحشّي
فيا راكب اللي علي الطرقات منتحري
طبلونه اربع ميه و تقول ما يمشي
ينصا براهيم راعي العز و القدري
بو كوثر اللي له الجزلات تنقشّي
سلم عليه و تقهوا دلة العصري
و اقلط علي وحدتن من ضانه الحرشي
و قل وداعه ليوم البعث و الحشري
شيهانتن من صغرها عظمها هشّي
ليا بكت مرة ٍ ابكي لها عشري
وكن الغضا في صميم الجوف متوشّي
وليا ضحكت كن قلبي حايز ٍ نصري
و مثل المطر في الجحيفة قام يرتشّي
ثم ان علي بريم قام يصب منهمري
و صارت سيوله مع الشعبان تهترشي
فيا سعد عيني ليا من شفتها تجري 
و يا سعد عيني ليا من شفتها تمشي
و يا سعد قلبي ليا نامت وسط حجري
وادرا عليها كما يِدرا علي القرشي
راما كما الروح في شريانها تسري
و القلب لا شافها ينبض و ينتعشي
الجد شيخ منه الانذال تنقهري
زعيم قومه بوقت الهش والنشّي
من طيبته كن بيته ساحة النحري
ينحر بها الضأن والقعدان والهرشي
ابن جلوي سعد مثل الشبا المبري
يوم ان غيره عن الضيفان منخشّي
والخال مدشوش من كسابة الظفري
ذبّاحة القوم لا غاروا علي الطرشي
فيا بوك خليك في قلب السما بدري
و تربعي فوق قلبي وابني العرشي
و با صير لك طول عمري كني المصري
ما اقول  لا لو تبين العين والرمشي